(إعلان بيع )....عبدالحميد وهبه
September 21, 2023 at 11:37 am,
No comments
(إعلان بيع )مين يشتري قلبي الجريح
اللي خلاص مات وإنكسر
أخلص وعاش عمره صريح
وصارحته فيه سابت أثر
جايز طيابتُه زيادة دي أكبرها عيب
جايز عشان حب القُريّب والغريب
علشان كده الجرح مش ممكن يطيب
إلا بمرور الوقت أو حُكم القدر
مين يشتري قلبي الجريح
اللي خلاص مات وإنكسر
أنا مش ببيع قلبي أكيد من أجل شئ
أو عارضه للبيع يعني من كتر الهموم
أنا بس شايف إنه عاش عمره برئ
طيب قوي بزيادة يعني عن اللزوم
و ده عيب أكيد مش راح يقلّل يعني منه
ده أكيد هيرفع م التمن ويعلّي شأنُه
وإن اللي خلّاني أبيع وأستغى عنه
إن الطيابة بتترفض يوم بعد يوم
إعلان أخير للعرض إنه خلاص بدأ
مين اللي هيزوّد بقى ومين يشتري
العرض مُعلَن للجميع و ع الملأ
قررت أبيع فعلاً لأول مُشتري
لو حصّلت راح أبيع بأرخص التمن
ولا يعني أسيبُه لناس لا يمكن تُأتمن
وأكيد هلاقي يعني بمرور الزمن
القلب اللي يبيع ويصبح مفتري
بقلمي عبدالحميد وهبه